Ikipe y’Abagore ya kaminuza ya East Africa University Rwanda ikina umukino wa Volleyball (EAUR WVC) yitwaye neza itsinda Ruhango WVC amaseti 3-2 mu mukino w’umunsi wa Gatatu wa Shampiyona.
Uyu mukino wabereye mu nzu y’imikino (Gymnasium) ya Kaminuza y’u Rwanda ishami rya Huye kuri uyu wa Gatandatu tariki 16 Ugushyingo 2024.
EAUR WVC y’umutoza Uwimana Abdoulkalim yatangiye yegukana iseti ya mbere ku manota 25-22.
Mu iseti ya kabiri yagoranye cyane , gusa Ruhango WVC iyitwara itsinze EAUR WVC amanota 27-25 ndetse ihita yiyongeza n’iseti ya kabiri ku manota 25-15.
EAUR WVC yari Imaze gutsindwa amaseti 2-1 ntiyigeze icika intege ahubwo yavuye inyuma itwara iseti ya kane y’umukino ku manota 25-19 bituma hiyambazwa iseti ya kamarampaka izwi nka ‘seul’.
Amakipe yombi yinjiye muri iyi seti ahatanira kuyegukana gusa iza kurangira EAUR WVC itsinze urugamba ku manota 17-15, umukino urangira ari amaseti 3 ya EAUR WVC kuri 2 ya Ruhango WVC.
Uyu ni wo mukino wa mbere EAUR WVC itsinze kuva shampiyona yatangira kuko ku mukino w’umunsi wa mbere yatsinzwe na Police WVC naho ku mukino w’umunsi wa kabiri itsindwa na RRA WVC.
Imikino y’umunsi wa Gatatu wa Shampiyona ya volleyball y’Abagore yatangiye kuri uyu wa Gatanu i Gisagara aho ikipe ya APR WVC yatsinze Kepler WVC amaseti 3-0.
Imikino yakomeje kuri uyu wa Gatandatu aho Police WVC yatsinze Wisdom School amaseti 3-0 naho RRA WVC itsinda RP Huye amaseti 3-0.
Imikino irakomeza kuri iki cyumweru, EAUR WVC ikina na Wisdom School, mu gihe Ruhango WVC izakina na APR WVC naho Kepler WVC ikine na RP Huye.
