Uwari umuvugizi w’umutwe wa Hezbollah Mohammed Afif yiciwe mu gitero cyagabwe na Israel mu mujyi wa Beirut muri Libani kuri iki cyumweru tariki ya 17 Ugushyingo 2024.
Afif wari umuvugizi w’uyu mutwe wa Hezbollah yatangiye kumvikana cyane nyuma y’uko uwari uyoboye uyu mutwe Hassan Nasrallah apfuye kuwa 27 Nzeri 2024.
Mohammed Afif yari afite izina rikomeye mu bijyanye n’itumanaho mu mutwe wa Hezbollah. Yahitanywe n’igisasu cyatewe ku cyicaro cy’ishyaka rya politiki rya Baath mu gace gatuwe cyane ka Ras al-Naba ku cyumweru, nk’uko byatangajwe n’Ikigo cy’Igihugu cya Libani gishinzwe amakuru (National News Agency).
Iki gitero cyabaye mu gihe intambara hagati ya Israel na Hezbollah ikomeje kwiyongera, aho Israel igamije guhagarika ibikorwa bya gisirikare bya Hezbollah no gukuraho ubuyobozi bukomeye bw’uyu mutwe mu karere k’Amajyaruguru ya Liban.
