Yanditswe na Abizeye Leandre
Ikipe y’Igihugu y’u Rwanda, Amavubi, yageze i Kigali saa 17:00 ku wa Gatanu tariki ya 2 Ukwakira 2026, nyuma y’urugendo rw’amasaha hafi 72 rwatangiriye muri Cap-Vert, aho yari ikubutse nyuma yo gutsinda icyo gihugu ibitego 2-1.
Amavubi yahagurutse muri Cap-Vert ku wa 30 Nzeri 2026, nyuma y’umukino wabereye i Praia ku wa Kabiri, aho yakuye intsinzi ikomeye mu gushaka itike y’Igikombe cya Afurika cya 2027.
Urugendo rwo gutaha mu Rwanda rwabaye rurerure, aho ikipe yanyuze mu bice bitandukanye mbere yo kongera kugera i Kigali. Nyuma y’amasaha menshi mu nzira, abakinnyi n’abatoza bageze mu Rwanda bafite akanyamuneza katewe n’intsinzi bari bakuye muri Cap-Vert.
Muri abo bakinnyi, rutahizamu Leroy-Jacques Mickels yagaragaje icyizere gikomeye ku rugendo Amavubi arimo rwo gushaka itike ya CAN 2027.
Ubwo yabazwaga niba u Rwanda ruzabona iyo tike, Mickels yasubije afite icyizere ati: “Tuzabona itike, kuki uvuga ngo ahari? Nta gushidikanya, tuzabona itike.”
Amavubi yatangiye urugendo rwo gushaka itike ya CAN 2027 neza, kuko amaze gutsinda Liberia ibitego 3-1 i Kigali, mbere yo gutsinda Cap-Vert ibitego 2-1 i Praia.
Iyi ntsinzi ya Cap-Vert yatumye Amavubi akomeza urugendo afite umwuka mwiza, ariko ikipe ikaba igomba guhita yerekeza ku yindi gahunda y’imikino.
Kugeza ubu, Amavubi ayoboye itsinda K n’amanota atandatu anganya Mali.
Ku wa Mbere tariki ya 5 Ukwakira 2026 nibwo amavubi azaba agaruka mu kibuga aho azakira Kenya kuri Stade Amahoro mu mukino wa gicuti.
Uyu mukino uzaha Amavubi umwanya wo gukomeza imyiteguro, nyuma y’umukino ukomeye yakinnye muri Cap-Vert ndetse n’urugendo rurerure rwakurikiyeho.
