Yanditswe na ABIZEYE Leandre
RSSB Tigers yasoje ku mwanya wa kane mu makipe atandatu yitabiriye FIBA Intercontinental Cup 2026, nyuma yo gutsindwa na Boca Juniors yo muri Argentine amanota 93–62 mu mukino wo guhatanira umwanya wa gatatu, wabaye ku wa 27 Nzeri i Beijing mu Bushinwa.
FIBA Intercontinental Cup ni rimwe mu marushanwa mpuzamahanga ahuza amakipe ahagarariye imikino ikomeye ya basketball ku migabane itandukanye. Ryatangijwe ku mugaragaro mu 1966 kandi irushanwa rya 2026 ryari ribaye ku nshuro ya 36.Mu 2026, amakipe atandatu yitabiriye irushanwa, RSSB Tigers ikaba yarahagarariye Afurika nyuma yo kwegukana Basketball Africa League (BAL) 2026.
Iyi kipe yari yitabiriye irushanwa bwa mbere, ihagarariye Afurika nyuma yo kwegukana Basketball Africa League (BAL) 2026. Mu mikino ine yakinnye, yatsinze umwe itsindwa itatu.
Tigers yatangiye irushanwa ku wa 22 Nzeri itsindwa na Rytas Vilnius yo muri Lithuania amanota 107–89. Bukeye bwaho, yatsinze Shanghai Sharks yo mu Bushinwa amanota 117–115 nyuma y’iminota y’inyongera.
Muri uwo mukino, Shanghai yigeze kurusha Tigers amanota 19. Icyakora, ikipe y’u Rwanda yagabanyije icyo kinyuranyo, Craig Randall II atsinda amanota atatu yatumye amakipe anganya, umukino ujya mu minota y’inyongera.
Randall yasoje afite amanota 30, aba umukinnyi wa Tigers watsinze menshi muri uwo mukino. Kapiteni Antino Jackson Jr. na we yatsinze amanota y’ingenzi ku murongo w’amafura mu minota y’inyongera.
Osborn Shema na Ntore Habimana bafashije ikipe bavuye ku ntebe y’abasimbura, bombi hamwe batsinda amanota 31.
Mu bisobanuro byatangajwe n’ikinyamakuru The New Times nyuma y’umukino, umutoza Henry Mwinuka yavuze ko guhindura uburyo ikipe yugariraga byayifashije kugaruka mu mukino.
Mwinuka yagize ati “uburyo twahinduye imikinire nyuma y’ igice cya mbere byadufashije cyane. Tuzabukoresha no mu mukino utaha, no mu bwugarizi ni uko: tuzajya duhinduranya duhinduranya abakinnyi marinda uwo bahanganye igihe mugenzi we amukingiye inzira (screen).”
Tigers yabonye itike ya kimwe cya kabiri kirangiza nyuma y’uko Rytas itsinze Shanghai, bituma ikipe y’u Rwanda isoza ku mwanya wa kabiri mu itsinda A.
Imikino ibiri ya nyuma ntiyayihiriye
Muri kimwe cya kabiri kirangiza, ku wa 26 Nzeri, Tigers yatsinzwe na NBA G League United yo muri Leta Zunze Ubumwe za Amerika amanota 114–95.
Igice cya mbere cyarangiye United irusha Tigers amanota atatu gusa. Icyakora, mu gace ka gatatu, United yarushije ikipe y’u Rwanda amanota 12, yongera ikinyuranyo cyayifashije kugera ku mukino wa nyuma.
Randall yatsinze amanota 25 muri uwo mukino, naho Teafale Lenard Jr. atsinda 22.
Bukeye bwaho, Tigers yahuye na Boca Juniors mu mukino wo guhatanira umwanya wa gatatu, idafite Craig Randall II, Teafale Lenard Jr., Nisre Zouzoua, Tyler Bey na Jonathan Galloway.
Nk’uko FIBA yabitangaje, abo bakinnyi ntibakinnye kubera imvune zoroheje no kwirinda ko zakomera.
Boca yarushije Tigers cyane cyane mu gufata imipira yabaga ivuye ku nkangara, izwi nka rebounds: yafashe 65, Tigers ifata 31. Ikipe yo muri Argentine yatsinze amanota 93–62, yegukana umwanya wa gatatu.
NBA G League United ni yo yatwaye igikombe itsinze Rytas Vilnius amanota 89–86 ku mukino wa nyuma. Tigers yabaye iya kane, ikurikirwa na Beijing Royal Fighters na Shanghai Sharks.
