Ikipe ya East African University Rwanda (EAUR) y’umukino wa basketball mu bagabo yegukanye igikombe cya shampiyona y’ikiciro cya kabiri nyuma yo gutsinda Inspired Generation imikino 3-1.
Kuri uyu wa gatatu tariki 30 Nyakanga 2025 nibwo EAUR BBC na Inspired Generation zakinaga umukino wa kane wa kamarampaka nyuma y’imikino itatu ya mbere yari yarangiye EAUR BBC itsinzemo ibiri, byari biteganyijwe ko aya makipe yombi yagombaga gukina imikino itanu (5), agatanguranwa gutsinda imikino itatu (3).
Umukino wa mbere wa kamarampaka wari warangiye EAUR BBC itsinze Inspired Generation amanota 87-61, mu mukino wa kabiri, Inspired Generation yatsinze EAUR BBC amanota 96-94 bisabye kujya mu minota y’inyongera naho umukino wa gatatu wabaye icyumweru gishize EAUR BBC yawutsinze ku manota 107-59.
Umukino wa kane wo kuri uyu wa gatatu watangiye saa moya z’ijoro muri Petit Stade i Remera ari naho habereye imikino itatu yabanje, umukino watangiye Inspired Generation igerageza kwitwara neza dore ko yaribizi ko isabwa gutsinda uyu mukino ngo hazakinwe umukino wa gatanu.
Agace ka mbere karangiye Inspired Generation itsinze amanota 17-16 gusa ntiyabashije gukomeza guhangana mu gace ka kabiri kuko yagatsinzwe na EAUR BBC amanota 26-14 byatumye amakipe yombi ajya kuruhuka EAUR BBC iyoboye umukino n’amanota 42-31.
Inspired Generation yongeye gutsinda agace ka gatatu ku manota 16-14 gusa n’ubundi ntiyabashije gukomeza kwihagararaho imbere ya EAUR BBC y’umutoza Kamanzi Janvier kuko yaje gutsindwa agace ka kane ku manota 25-11 bituma umukino urangira EAUR BBC itsinze amanota 81-58 biyiha kwegukana igikombe itsinze imikino 3-1.
Kimwe mu byatanze ikinyuranyo kuri uyu mukino harimo umubare munini w’abakinnyi batanga umusaruro ku ruhande rwa EAUR BBC yatsindiwe amanota 14 n’abakinnyi bavuye ku ntebe y’abasimbura ndetse abakinnyi basimburanaga ku buryo ntamunaniro wabarangaga, mu bakinnyi 12 bari ku rupapuro rw’umukino hakinnyemo abakinnyi 10 ndetse babiri muri bo nibo bonyine bakinnye iminota irenga 30 muri uyu mukino.
Ku ruhande rwa Inspired Generation, ntanota na rimwe yatsindiwe n’umukinnyi uvuye ku ntebe y’abasimbura ndetse mu bakinnyi 9 bari ku rupapuro rw’umukino, barindwi nibo bakinnye ndetse batatu muri bo bakinnye umukino wose badasimbuwe.
Ndayishimiye Cyiza Ben Ruben wa EAUR yafashije iyi kipe cyane aho yayitsindiye amanota 23, akora rebounds 5, atanga imipira 3 yavuyemo amanota mu minota 33 yakinnye. Muhire Mugabo nawe yatsinze amanota 20 muri uyu mukino.
Nyuma yo kwegukana igikombe cya Shampiyona y’ikiciro cya kabiri, EAUR BBC yahawe imidali n’igikombe biherekejwe n’ibahasha ya miliyoni 3 z’amafaranga y’u Rwanda.
Biteganyijwe ko EAUR BBC na Inspired Generation zirahita zizamuka mu kiciro cya mbere cya shampiyona y’u Rwanda mu bagabo.
