Kuri uyu wa gatanu tariki 20 Kamena 2025 ni bwo hatangira imikino ya kamarampaka (Playoffs) muri basketball mu bagabo hakinwa imikino ya 1/2 cy’irangiza muri BK Arena.
Saa kumi n’ebyiri z’umugoroba ikipe ya REG BBC yabaye iya kabiri ku rutonde rwa shampiyona, irakina na UGB yabaye iya gatatu ku rutonde rwa shampiyona naho APR BBC yabaye iya mbere ikine na Patriots BBC yabaye iya kane ku rutonde rwa shampiyona saa mbiri n’iminota 30 z’ijoro.
Iyi mikino ya kamarampaka ya basketball yitirirwa umuterankunga wayo mukuru BetPawa ni yo igena ikipe itwara igikombe cya shampiyona ndetse igatanga itike izakina imikino ya Basketball Africa League (BAL) ihuza amakipe 4 ya mbere muri shampiyona.
APR BBC
Ikipe y’ingabo z’u Rwanda, APR BBC ni ikipe yo kwitega muri iyi mikino dore ko yarangije imikino ya shampiyona ari yo iri ku mwanya wa mbere nyuma yo gutsinda imikino 15 muri 16 n’amanota 33. APR BBC yatsinzwe umukino umwe muri shampiyona y’uyu mwaka. yatsinzwe n’ikipe ya Patriots BBC
APR BBC ni yo kipe ifite ibikombe bibiri biheruka bya shampiyona ndetse iherutse gukora amateka mu mikino ya BAL aho yegukanye umwanya wa gatatu biyigira iya mbere ibashije kwegukana uyu mwanya mu makipe yose yo muri Afurika y’Iburasirazuba.
Abakinnyi bo kwitega mu ikipe ya APR BBC barimo Aliou Diarra wahembwe nk’umukinnyi wugariye neza (Best defensive Player) muri BAL iheruka, Ntore Habimana, Axel Olenga Mpoyo, Adonis Filer n’abandi.
APR BBC irakina na Patriots BBC yabaye iya kane muri shampiyona.
REG BBC
REG BBC ni yo kipe yabaye iya kabiri muri shampiyona nyuma yo gutsinda imikino 11 muri 16 ya shampiyona ikagira amanota 28. Mu myaka 4 itambutse, Ni yo kipe yari ikomeye mu Rwanda dore ko yanatwayemo ibikombe bibiri bya shampiyona byayihesheje kwitabira BAL ya 2022 n’iya 2023 n’ubwo itakomereje muri uyu mujyo mu myaka ibiri ishize.
Iyi kipe igomba kwitegwa cyane dore ko inafite umukinnyi ukomoka muri Senegale, Jean Jacques Boissy uherutse kuba umukinnyi mwiza muri BAL. Uyu mukinnyi kandi arafatanya n’bandi bakinnyi basanzwe bamenyereye shampiyona y’u Rwanda n’imikino ya kamarampaka nka Muhizi Prince, Cleveland Thomas Jr, Garmine Kande Kieli n’abandi mu rugamba rwo guhesha iyi kipe umwanya mwiza.
REG BBC irahura na UGB yabaye iya gatatu muri shampiyona.
UGB (United Generation Basketball) ni yo kipe yatunguranye kuba yarageze mu mikino ya kamarampaka dore ko shampiyona ijya gutangira, itari mu makipe yahabwaga amahirwe yo kuza mu makipe ane ya mbere. Gusa ntibyayibujije kuba ikipe nziza muri uyu mwaka yaje no kugera ku mukino wa nyuma w’irushanwa ryo Kwibuka aho yatsindiwe na APR BBC nabwo byagoranye.
UGB y’umutoza Murenzi Yves, yarangirije shampiyona ku mwanya wa gatatu n’amanota 26 ndetse byayisabye gutsinda ikipe ya REG BBC ku mukino wa nyuma wa shampiyona.
Muri aya makipe 4 agiye gukina BetPawa Playoffs, UGB ni yo yitwaye neza mu mikino itanu iheruka gukina muri shampiyona kuko yayitsinze yose.
Bamwe mu bakinnyi bo kwitega muri iyi kipe barimo Mohamed Doumbya, James Amatoe, na kapiteni wayo Steven Perriere.
UGB irakina na REG BBC yabaye iya kabiri ku rutonde rwa shampiyona.
Patriots BBC
Patriots BBC yarangije imikino ya shampiyona iri ku mwanya wa kane n’amanota 26 nyuma yo gutsinda imikino 10 muri 16 ya shampiyona. Mu makipe yatsinze harimo amakipe nka APR BBC mu mukino ubanza, UGB, REG BBC na Tigers.
Patriots BBC nyuma yo kwitabira BAL ya 2021 ubwo yabaga ku nshuro ya mbere ntiyigeze yongera gutwara igikombe cya shampiyona mu Rwanda. Umwaka ushize yageze ku mukino wa nyuma ariko itsindwa na APR BBC.
Nk’ikipe ikomeye, Patriots BBC ihora yitezweho byinshi gusa nk’uyu mwaka ntabwo wayoroheye dore ko yawutangiye itsindwa, itakaza abakinnyi bayo bari inkingi za mwamba barimo William Perry na Ndayisaba Ndizeye Dieudonne ndetse ihura n’ibibazo by’amikoro byanayikomye mu nkokora bigatuma itongeramo abakinnyi .
N’ubwo wari umwaka ugoye kuri Patriots BBC, ni yo kipe rukumbi yabashije gutsinda APR BBC muri shampiyona ndetse ifite abakinnyi bakomeye bo kwitega barimo Hagumintwari Steve, Furaha Cadeaux de Dieu, Cole Elliott Lamar ndetse na Raphiael Putney baherutse kongeramo.
Biteganyijwe ko muri 1/2 amakipe azakina imikino 5, bivuze ko azatanguranwa gutsinda imikino 3 naho ku mukino wa nyuma amakipe akazakina imikino irindwi bivuze ko azatangurwanwa gutsinda imikino 4. Kuri uyu wa gatanu ni bwo hakinwa imikino ya mbere (Game 1) ya 1/2 iri bubere muri BK Arena i Remera.
